صرح الفنان كريم فهمي خلال استضافته ببرنامج “أنا والقناع” الذي تقدمه الإعلامية منى عبدالوهاب على شاشة “الحياة” إن بناته نقطة ضعفه قائلاً: “طول الوقت بقول إني لا أتحمل عليهم أي شيء، وأوقات بيدفعوني كمصدر قوة إني لازم أشتغل وأجتهد عشان آخد فلوس وأقدر أصرف عليهم”.
وأضاف: “دايما بتعامل مع بناتي بقناع الدلع، ومش عايز أحسسهم بأي مشاكل حتى لو فيه مشاكل بين أي أب وأم مش لازم أحسسهم بحاجة زي أي بيت، وأهم حاجة إنهم غيروا في حياتي كتير”.
وتابع: “دانيا مراتي بتدلعهم لكن أوقات بتكون ناشفة معاهم لمصلحتهم بشكل ما في أوقات كتير، ومينفعش إحنا الاتنين نعمل دا، واديتهم اطمئنان اتحرمت منه”.
كما قال خلال اللقاء: “أنا مش مثالي لكن الفلوس بالنسبة لي وسيلة، وبحب أبسط اللي حواليا، ومش بعرف يكون فيه فلوس في جيبي، وأهمية الفلوس في إنك تبسط اللي حواليك”.
قال الفنان كريم فهمي، إنه ظل عاما كاملاً يتناول الكورتيزون بسبب ضغط العمل وأضاف: “أنا من الناس القليلة اللي بيشتغل على معظم الأفلام اللي بكتبها وقلبي بيكون على الحاجة والشغلانة، وكل تفصيلة بحاول أبقى عيني عليها، وبشتغل بقلب، وبيكون قلبي على الحاجة ودا عامل لي مشاكل كبيرة في الجلطات والقولون”.
وأوضح: “عندي قرح في القولون بسبب الضغوطات الكبيرة، وقعدت سنة كاملة اخد كورتيزون بسبب أزمة منتصف العمر، لكن أوقات بتعامل مع ناس عايزة تخلص الشغلانة وخلاص، وأنا مش بتاع دا”.
“أنا والقناع” برنامج رمضاني تقدمه الإعلامية منى عبدالوهاب ويُعرض على قناتي الحياة وcbc ضمن خريطة الشركة المُتحدة للخدمات الإعلامية وإنتاج شركة DS+.