حلت الفنانة أنغام ضيفة في برنامج ABtalks مع الإعلامي الإماراتي أنس بوخش، وفي البرنامج تحدثت عن علاقتها بشقيقتها الراحلة غنوة.
قائلة: “الموقف كان قاسي جدا، وماكنتش عايزة أصدق خالص لحد ما أنا غسلتها بإيدي وكنت عايزة أصحيها”.
وتابعت خلال تصريحات إعلامية: “على الرغم من إننا مكناش على علاقة كويسة ببعض، بس مكنتش أتخيل دا يحصل، مش بحب أدافع عن نفسي، ومش بحب اتكلم عن حد مش موجود، بس اللي أقدر أقوله بمنتهى الأمانة، عمري ما كنت سبب إني غنوة تزعل مني، أو يحصل بينا المشكلة”.
وعن الخلاف بينهما أشارت: “دي كانت بنتي مش أختي، الفرق بينا أكثر من 16 سنة، لو عمرها طال شوية كان ممكن الأمور تتغير، وممكن كانت عذرتني ولكن ربنا أراد كدا، هي معرفتش تعذرني وهي كمان معذورة الله يرحمها، لأنها ملقتش اللي يحنن قلبها”.
وقد وجهت الفنانة أنغام رسالة إلى شقيقتها الراحلة غنوة وقالت: “وحشتيني أوي، وحشتني بنتي الصغيرة اللي كنت بسرح لها شعرها وأحميها في حضني تحت الدش، وياسين أحلى حاجة سابتها في الدنيا، سابتلي نعمة وهدية كبيرة وحتى من قلبها وهو في عينيا”.
وقد تحدثت الفنانة أنغام عن طفولتها وقالت: “اتعلمت الموسيقى وأنا عمري ست سنوات، وطريقة تعليمي كانت قاسية، وكنت بلعب بيانو وأنا صوابعي متكسرة من البرد وساعات نومي قليلة، ولكنه كان مسؤولية كبيرة”.
وصفت أنغام نفسها بـ المحظوظة، ولكن تابعت بعدها قائلةً: “البيت مكنش أسعد حاجة مكناش الأسرة السعيدة، وكانوا بيتعاملوا معايا على إني كائن فاهم وكنت بشيل حاجات ومكنتش عايزة اشيلها، وجزء من المعاناة، وأمي كانت طفلة من جواها وعلى الحياة اللي كانت فيها، وأنا طفلة مكنتش عايزه استوعبها، أب وأم مش سعداء مع بعض، والأم أكتر مكنتش سعيدة كانت مقهورة ومش محبوبة كفاية من الراجل، وده بينعكس على الطفل اللي في البيت”.
يذكر أن أنغام أحيت مؤخرا حفلا كامل العدد بمدينة العلمين الجديدة، ضمن فعاليات مهرجان العلمين في دورته الأولى، وقدمت خلال الحفل مجموعة كبيرة من أغانيها وسط تفاعل عدد كبير من الجماهير.
وقالت الفنانة أنغام، كنت مبهورة من الحالة التى كانت بينى وبين الجمهور فى حفل مدينة العلمين الجديدة، والحضور الكبير المحترم والجمهور الراقى من المصريين وأشقائنا من معظم الدول العربية، حيث حضر جمهور من السعودية وقطر والكويت.